2018 წლის დეკემბერში კაპრი ჰოლდინგმა ვერსაჩეს მოდის სახლი 2.1 მილიარდ დოლარად შეიძინა. სიახლემ აზრთა სხვადასხვაობა გამოიწვია. მაიკლ კორსის კაპრი ჰოლდინგის მიზნები თავიდანვე ცხადი იყო, თუმცა ვერსაჩეს მხრიდან დამოუკიდებლობაზე უარის თქმა, იტალიური ფესვების უგულებელყოფა და მოწინავე პოზიციაზე მყოფის ნაცვლად, ჯერ კიდევ განვითარებად ჯგუფთან შეერთება მოულოდნელი არჩევანი იყო. ერთადერთი ლოგიკური აზრი, რომელიც დონატელას გადაწყვეტილებას ხსნის, ვერსაჩეს კომერციულ გიგანტად ქცევაა.

2020 წლის შემოდგომა/ზამთრის კოლექცია, რომელიც იტალიურმა ბრენდმა გუშინ წარადგინა, ამ ფართოდ გავრცელებული აზრის დასტურია.

გასული სეზონების გლამურის შემდეგ, ვერსაჩემ აქცენტი კვლავ სპორტულ, კომფორტულ და ქუჩის სტილზე გააკეთა. ქუჩის სტილის ელემენტების შეტანა წმინდა გლამურის, ფუფუნების იდეის მატარებელ ბრენდში მას უკვე აახლოვებს ამერიკასთან, ამავდროულად ერგება მომხმარებლების ახალ მოთხოვნილებებსაც.

Versace შემოდგომა/ზამთარი 2020 – მილანის მოდის კვირეული

Vogue Runway
Vogue Runway

შოუ მინიმალისტური შავი ლუქებით გაიხსნა, თუმცა კოლექცია მინიმალიზმისგან ძალიან შორსაა. დონატელა ეცადა მაქსიმალურად გაეერთიანებინა ყველაფერი, რაც მომავალ სეზონზე შეიძლება გაიყიდოს.

ჯამში, ქალის და მამაკაცის 91 ლუქი, რომელიც ვიწრო და ჩაბნელებულ სივრცეში ძალიან მოკლე დროში წარგვიდგინა, სანახაობრივად კარგ ეფექტს არ ქმნიდა, თუმცა უნდა ვივარაუდოთ, რომ მაღაზიების თაროებს და კაპრი ჰოლდინგის საბანკო ანგარიშებს ნამდვილად დაამშვენებს.

Vogue Runway
Vogue Runway
Vogue Runway

ვერსაჩეს ჩვენება ცნობილი მოდელების გარეშე წარმოუდგენელია. არც გუშინდელი შოუ ყოფილა გამონაკლისი შემთხვევა. პოდიუმზე ვიხილეთ: ნატაშა პოლი, ჯიჯი ჰადიდი, ირინა შეიკი, კაია გერბერი, ბელა ჰადიდი, ანია რუბიკი, მარიაკარლა ბოსკონო და ანა ევერსი. ჩვენება ვერსაჩეს 2020 წლის გაზაფხული/ზაფხულის კამპანიის სახემ, კენდალ ჯენერმა დახურა.

Vogue Runway
Credit: Celebsfirst.com

ვიდეო: Versace შემოდგომა/ზამთარი 2020