სტრიმინგ სერვისმა Netflix-მა 2022 წლის ერთ-ერთი ყველაზე რეიტინგული სერიალის Wednesday-ის მეორე სეზონი ოფიციალურად დაამტკიცა. Wednesday ცნობილი კინორეჟისორის, ტიმ ბარტონის გადაღებული სერიალია, რომელსაც დაანონსების დღიდან უამრავი მაყურებელი მოუთმენლად ელოდა.
„ადამსების ოჯახის“ ისტორიის ერთ-ერთი გმირის შესახებ გადაღებული შოუს პრემიერა 2022 წლის 23 ნოემბერს შედგა. სერიალების ინდუსტრიაში ბარტონის დებიუტი წარმატებული აღმოჩნდა და სერიალის პირველმა სეზონმა Netflix-ის რეკორდი მოხსნა.
პირველივე თვეში სერიალის ყურების ჯამურმა ხანგრძლივობამ 1,2 მილიარდი საათი შეადგინა. Wednesday-ის როლს ჯენა ორტეგა ასრულებს. სერიალში ასევე მონაწილეობს კეტრინ ზეტა ჯონსი და GOT-ის ვარსკვლავი – გვენდოლინ კრისტი.
რაც შეეხება სერიალის გაგრძელებას, მეორე სეზონის პრემიერის თარიღი ამ ეტაპზე უცნობია.
