მიუხედავად Disney-ს მოლოდინისა, „ფიფქიას“ ახალი მხატვრული ეკრანიზაცია წარუმატებელი პროექტი აღმოჩნდა. ამჯერად, IMDb-მ ის მომხმარებელთა შეფასებების მიხედვით, ერთ-ერთ ყველაზე ცუდ ფილმად დაასახელა.
IMDb-ზე რეგისტრირებულ მომხმარებლებს შეუძლიათ ფილმები 10-ბალიანი სისტემით შეაფასონ, რაც საბოლოოდ საშუალო რეიტინგს ადგენს. ამ ეტაპზე, „ფიფქიას“ რეიტინგი 10-დან 1.6-ს აღწევს. სტატისტიკის მიხედვით, გამოკითხვაში მონაწილე მომხმარებელთა 90%-მა ფილმს 1 ქულა დაუწერა. სრული 10 ქულა მას მხოლოდ 2,5%-მა მიანიჭა.
ფილმზე უარყოფითად არა მხოლოდ ნეგატიური შეფასებები, არამედ მთავარი როლის შემსრულებელი რეიჩელ ზეგლერის ირგვლივ აგორებული სკანდალი აისახა. ზეგლერმა არაერთხელ გააკრიტიკა 1937 წელს გამოსული ანიმაცია. მისი უარყოფითი დამოკიდებულება საზოგადოების ნაწილმა აღიქვა, როგორც არასწორი მიდგომა კლასიკური ზღაპრის მიმართ.
მსახიობი სხვა მხრივაც პრობლემურ ურთიერთობაში იყო Disney-სთან. ვრცელდებოდა ინფორმაცია, რომ კინოკომპანიამ „ფიფქიას“ კამპანიის პერიოდში, სპეციალური სოციალური მედიის მენეჯერი დაიქირავა იმისთვის, რომ ზეგლერის პოსტები გაეკონტროლებინა. ეს მას შემდეგ მოხდა, რაც მსახიობმა დონალდ ტრამპზე შეურაცხმყოფელი კომენტარები გააკეთა, რამაც კონსერვატორი მაყურებლების უკმაყოფილება გამოიწვია.
გარდა ამისა, ინტერვიუებში ზეგლერი ხშირად აღნიშნავდა, რომ „ფიფქიას“ რიმეიქში მას სერიოზული და დამოუკიდებელი პერსონაჟის როლი აქვს, თუმცა მისი საუბრის ტონი და დამოკიდებულება სოციალური ქსელების მომხმარებელთა დიდ ნაწილს ქედმაღლურად მოეჩვენა. მაგალითად, ერთ-ერთ ინტერვიუში თქვა, რომ მას „არასდროს უყვარდა ორიგინალი ფილმი“ და რომ პრინცთან „სიყვარულის ხაზს საერთოდ ამოიღებდნენ“. ეს განცხადებები ბევრმა აღიქვა, როგორც Disney-ს მემკვიდრეობის მიმართ უპატივცემულობა.
რიმეიქში 1937 წლის ანიმაციის რამდენიმე მნიშვნელოვანი ასპექტი შეცვალეს, რამაც მაყურებელთა ნაწილის უკმაყოფილება გამოიწვია და გაჩნდა მოსაზრება, რომ Disney-მ ფილმის შინაარსი და კონტექსტი ე.წ. Woke კულტურას დაუქვემდებარა.
ამჟამად, ფილმის რეიტინგი Rotten Tomatoes-ზე 42%-ია, რაც ნიშნავს, რომ ის „დაბალი შეფასების“ კატეგორიაში ხვდება. მისი პრემიერა აშშ-ის კინოგაქირავებაში 42.2 მილიონი დოლარით გაიხსნა, რაც ბევრად ნაკლებია წინასწარ მოლოდინებთან შედარებით და ფინანსურად წამგებიანი პროექტია, თუ გავითვალისწინებთ იმას, რომ ფილმის ბიუჯეტი 240–270 მილიონ დოლარს შორის მერყეობს.
