ბოლო დროს სოციალურ მედიაში აქტიურად განიხილავენ ჰეილი ბიბერის შესახებ შექმნილ ვიდეოს, სახელწოდებით Hailey Bieber’s Dangerous Decade-Long Obsession, რომელიც “7-ნაწილიანი დოკუმენტური ფილმის” სახელითაც არის ცნობილი. ვიდეო კრიტიკულ ტონს შეიცავს ჰეილი ბიბერის მიმართ და ძირითადად ეხება მის ურთიერთობას ჯასტინ ბიბერთან.
ვიდეოს ფრაგმენტები TikTok-ზე ვირუსულად გავრცელდა და დიდი დისკუსია გამოიწვია. ზოგიერთი ამას საგანგებოდ შექმნილ ნარატივად მიიჩნევს. ზოგი ფიქრობს, რომ ეს უბრალოდ ჭორებია, რომლებიც რეალურ ფაქტებს ამახინჯებს. ზოგი კი აღნიშნავს, რომ ის ფაქტებით ადასტურებს ჰეილი ბიბერის ობსესიას ჯასტინ ბიბერის მიმართ.
პირველ რიგში უნდა ითქვას, რომ ეს არ არის ოფიციალური დოკუმენტური ნამუშევარი და არც მისი შინაარსია ოფიციალურად დადასტურებული. მასალა YouTube-ზე დამოუკიდებელმა კონტენტ კრეატორებმა გამოაქვეყნეს.
ვიდეოში ნათქვამია, რომ ჰეილი ათწლეულის განმავლობაში სტრატეგიულად ცდილობდა ჯასტინ ბიბერთან დაახლოებას, რისთვისაც იყენებდა თავის კავშირებს და გააზრებულ ნაბიჯებს დგამდა. დოკუმენტურ ფილმში ამტკიცებენ, რომ ჰეილის ისტორია 2009 წელს დაიწყო, როცა მამამ, მსახიობმა და პროდიუსერმა სტივენ ბოლდუინმა, The Today Show-ს კულისებში ჯასტინს გააცნო. ფილმში ჰეილის “სუპერფანს” უწოდებენ, რომელიც შეპყრობილი იყო ბიბერით. მაგალითად მოყვანილია მისი დასწრება ჯასტინის 2012 წლის Toyota Concert Series-ის გამოსვლაზე და 2011 წელს ლოს-ანჯელესში გამართულ Never Say Never-ის პრემიერაზე.
2010-2018 წლებში ჯასტინ ბიბერი და სელენა გომესი ერთმანეთს ხვდებოდნენ, თუმცა მათ ურთიერთობას თან ახლდა პერიოდულად დაშორება და კვლავ შერიგება. ვიდეოში ამტკიცებენ, რომ 2012 წელს, მაშინ როცა ჯასტინი და სელენა შაბათ-კვირას ერთად დადიოდნენ რესტორნებსა და კინოში, ჰეილი მათ კვალს მიჰყვებოდა, ყველგან ჩნდებოდა და შორიდან ადევნებდა თვალს ჯასტინს. ვიდეოში ასევე ჩასმულია ბიბერის ნიუ-იორკელი ფანის, დეინას მონაყოლი. დეინა ამტკიცებს, რომ 2011 წელს ჰეილიმ მის მიერ შექმნილი ჯასტინ ბიბერის ფანკლუბის ანგარიში გამოიწერა. ამ ანგარიშს 200,000-ზე მეტი მიმდევარი ჰყავდა. დეინას მტკიცებით, ამის შემდეგ ჰეილი მასთან კავშირზე იყო, რათა ჯასტინის ადგილსამყოფელის შესახებ ინფორმაცია მიეღო. ამის დასამტკიცებლად, ვიდეოში მიმოწერის ე.წ. სქრინები, პოსტები და კომენტარებიც არის ნაჩვენები.
ფილმის ერთ-ერთ ნაწილში განხილულია ცნობილი კონსპირაციული თეორია, რომ ჰეილი ბიბერს ჯასტინთან დაახლოებაში კენდალ ჯენერი და ჯიჯი ჰადიდი დაეხმარნენ. 2014 წლის ბოლოს, ახალი წლის დღესასწაულისთვის, სელენა გომესი კენდალ ჯენერთან და ჯიჯი ჰადიდთან ერთად დუბაიში გაემგზავრა. მოგზაურობა სოციალური ქსელების წყალობით ყურადღების ცენტრში მოექცა, რადგან სელენა და მისი მეგობრები აქტიურად აზიარებდნენ ფოტოებსა და ვიდეოებს. სელენა გომესის ფანების დიდი ნაწილი დღემდე მიიჩნევს, რომ ეს მოგზაურობა წინასწარ იყო დაგეგმილი იმ მიზნით, რომ ჰეილი ბიბერი და ჯასტინ ბიბერი ერთმანეთს უფრო დაახლოებოდნენ. ეს თეორია ეყრდნობა იმ ფაქტს, რომ მოგზაურობა კენდალ ჯენერმა დააორგანიზა, რომელიც მაშინ სელენას მეგობარი იყო, მაგრამ მოგვიანებით ჰეილი ბიბერთან უფრო დაახლოვდა. იმავე პერიოდში, როცა სელენა დუბაიში იყო, ჯასტინი მასთან დაშორებული იყო და ლოს-ანჯელესში ჰეილი ბიბერთან ერთად ატარებდა დროს, რაც სხვადასხვა პაპარაცულ ფოტოშიც დაფიქსირდა. სელენას ფანების აზრით, მოგზაურობა უბრალოდ საბაბი იყო, რომ სელენა გომესი ჯასტინისგან შორს ყოფილიყო, ხოლო ჰეილის მასთან დასაახლოებლად მეტი შანსი ჰქონოდა.
დოკუმენტურ ვიდეოში ერთ-ერთი ეპიზოდი ეხება მომღერალ Halsey-ს. წლების წინ Halsey პაპარაცებმა ჯასტინ ბიბერთან ერთად დააფიქსირეს. ამის შემდეგ ჰეილი ბიბერმა სოციალურ ქსელში ატვირთა ვიდეო, სადაც თავის მძღოლს მომთხოვნი ტონით ეუბნება, რომ მანქანაში ჩართული Halsey-ს სიმღერა შეცვალოს. ვიდეოში ჩანს, რომ ჰეილი ბიბერი ამ დროს საკმაოდ გაღიზიანებულია.
Hailey Bieber’s Dangerous Decade-Long Obsession-ში ყურადღება ასევე გამახვილებულია ისეთ ფაქტებზე, როგორებიცაა ჰეილის მხრიდან სელენას ჩაცმის სტილის მიბაძვა. ამის საილუსტრაციოდ ვიდეოში სელენას და ჰეილის ფოტოებია ნაჩვენები. ასევე საუბარია ჰეილის მიერ სელენას მსგავსი პროექტების წამოწყებაზე, როგორიცაა სამზარეულოს შოუები. ვიდეოში ასევე ნაჩვენებია სელენა გომესის და ჰეილი ბიბერის ბრენდების მსგავსი კამპანიები. ვიდეოში მითითებულია, რომ ყველა შემთხვევაში სელენა გომესი პირველი იყო და მას ჰეილიმ მიბაძა. ასევე ნაჩვენებია გომესის და ჰეილის მსგავსი შინაარსის ინტერვიუები და ყველა შემთხვევაში ვიდეოს ავტორი მაყურებელს ახსენებს, რომ გომესის ინტერვიუ წლებით, ან თვეებით ადრეა ჩაწერილი.
ვიდეოში არის სხვა პარალელებიც. მაგალითად, 2015 წელს სელენამ ყურთან პატარა ტატუ გაიკეთა – ეს იყო ასო G, რომელიც თავის უმცროს დას, მიუძღვნა. ორ კვირაში ჰეილიმ უკან კისერზე ასევე G ტატუ დაიხატა. ვიდეოში საუბარია კიდევ ერთ ტატუზე. ჰეილიმ ქორწინების შემდეგ თითზე J ამოისვირინგა. ტატუს ფორმა ძალიან ჰგავს ბეჭედს, რომელიც წლების წინ ჯასტინ ბიბერმა სელენა გომესს აჩუქა.
გარდა ამისა, ვიდეოში მოყვანილია რამდენიმე ფრაგმენტი სოციალურ ქსელში გავრცელებული ვიდეოებიდან, სადაც ჯასტინ ბიბერის ჰეილისადმი დამოკიდებულება ჩანს. ვიდეოს კონტექსტის მიხედვით, ეს დამოკიდებულება უარყოფითია და აჩვენებს, თუ რამდენად არაკეთილგანწყობილია ჯასტინი ჰეილი ბიბერის მიმართ. მაგალითად, ერთ-ერთ ასეთ ვიდეოში ჯასტინი ჰეილის ეუბნება, რომ დიდი ხნის წინ დაშორდებოდა, ასეთი მიმზიდველი რომ არ იყოს.
Hailey Bieber’s Dangerous Decade-Long Obsession-ს დღემდე აქტიურად განიხილავენ TikTok-ზე და საკუთარ მოსაზრებებს, თეორიებსა და გაგებულ ისტორიებს ასახელებენ. მაგალითად კიდევ ერთი გავრცელებული, დაუზუსტებელი ინფორმაციის მიხედვით, ჯასტინმა ჰეილისთან ქორწილის დღეს სელენას 23 მესიჯი გაუგზავნა.
მიუხედავად ვიდეოში ნაჩვენები ფაქტებისა, უნდა აღინიშნოს, რომ ისინი ძირითადად ფრაგმენტული ხასიათისაა, რაც მის სრულ კონტექსტს ეჭვქვეშ აყენებს, თუმცა ამავდროულად ამ ფაქტების ერთობლიობა გარკვეულ ეჭვებსაც აჩენს. სწორედ ამიტომ იქცა ვიდეო ვირუსულად განხილვად თემად.
იხილეთ სრული ვიდეო:
