სიმართლე უნდა ითქვას, 2016 წლის სექტემბერში, როდესაც მოდის დედაქალაქი, პარიზი დატვირთული იყო მნიშვნელოვანი სადებიუტო შოუებით, არავინ ელოდა, რომ დიზაინერების კარუსელის ცვლილებებით გამოწვეულ აურზაურში 16 წლის ახალბედა მოდელი შექმნიდა თავის მომენტს. ადუთ აკეჩის მომენტი შეიქმნა ზუსტად მაშინ, როდესაც სან ლორანში ენტონი ვაკარელოს ჩავარდნის მოლოდინში ვიყავით. კოლექცია იყო საკმარისად კარგი სატარებლად, მაგრამ ზედმეტად ფრთხილი დასამახსოვრებლად, თუმცა ეს სტატია ენტონის არ ეხება, არამედ გოგონას, რომელიც 2019 წლის სექტემბერში ვოგის 5 გამოცემის ყდაზეა. ამ გოგონას ცხოვრებაში ჰოლივუდური ზღაპარი სწორედ სან ლორანში ენტონი ვაკარელოს სადებიუტო შოუზე დაიწყო.

„როდესაც მოდელი განსაზღვრავს და წარადგენს მოდაში არსებულ მომენტს, ის უფრო მეტი ხდება, ვიდრე მოდელი. ახლა მოდაში ადუთის მომენტია.” – ტიმ ბლენქსი.

ყველა დიდებული მოდელის კარიერა შესაფერის მომენტს უკავშირდება. არავინ ხდება თაობის სახე მხოლოდ ლამაზი ფიგურის და მიმზიდველი გამომეტყველების გამო. როდესაც ვოგის ყდას, ან შანელის პატარძალს ვუყურებთ, ჩვენ მხოლოდ ლამაზმანს არ უნდა ვხედავთ.

„იყო ვოგის ყდაზე, მსოფლიოსთვის რაღაცას უნდა ნიშნავდეს. პოსტერი, სარკეა იმის, რაც მსოფლიოში ხდება.” – ანა ვინტური.

ადუთ აკეჩი ხურავს ვალენტინოს ჩვენებას პარიზის ოტ კუტიურ მოდის კვირეულზე

წლების განმავლობაში პოდიუმზე და სარეკლამო კამპანიებში შავკანიანი გოგონების რიცხვი იმატებდა, თუმცა თვალსაჩინო იყო, რომ ისინი თავიანთი რასის ყველაზე ღია კანის ფერის წარმომადგენლები იყვნენ. შედეგად ინდუსტრიაში ჩამოყალიბდა მიდგომა, რომლითაც გაიყო შავკანიანი მოდელი (Black Model: ჯოან სმოლსი, იმანი, სინდი ბრუნა, ადოა აბოა) და მუქი კანის მოდელი (Dark Skin Model: ალეკ ვეკი, ლეილა ენდიეი, ანოკი, დაქი). შავკანიანი მოდელებისთვის მაღალი მოდის მწვერვალისკენ მიმავალი გზა მარტივი არასდროს ყოფილა, თუმცა ჟურნალების, ჩვენებების და კამპანიების სტატისტიკა ცხადყოფდა, რომ მუქი კანის გოგონებთან შედარებით საკმაოდ დიდი პრივილეგიით სარგებლობდნენ. ამიტომ არის ადუთ აკეჩის ვოგის სექტემბერის 5 ყდა აღსანიშნი. ის პირველი მუქი კანის მოდელია, რომელმაც ეს შეძლო. დიახ, ნაომი ქემბელის ლეგენდარული კარიერაც კი არ ითვლის 1 წელიწადში ვოგის 5 ყველაზე მნიშვნელოვან გარეკანს.

ადუთ აკეჩი სამხრეთ სუდანში დაიბადა და თავისი ცხოვრების პირველი 8 წელი დევნილების ბანაკში გაატარა. იხსენებს, რომ ბავშვობაში ზუსტად ვერ ხვდებოდა რა ხდებოდა, მაგრამ საფრთხეს გრძნობდა. ადუთის ბავშვობაში ნორმალური არაფერი იყო, თუმცა მაინც ცდილობდა ჩვეულებრივი 8 წლის გოგონა ყოფილიყო.

„დევნილების ბანაკში ვხოვრობდი, მაგრამ თავიდან ვერ ვხვდებოდი, რომ დევნილების ბანაკი იყო, რადგან დედაჩემი და ჩემი ბიძაშვილები იყვნენ ჩემს გვერდით. ბევრი ცუდი, საშინელი რამ მახსოვს.“

შემდეგ იყო მიგრაცია ავსტრალიაში, სადაც ცხოვრება ხელახლა უნდა დაეწყო. ახალ რეალობაში ყველაზე მიმზიდველად სკოლაში სიარულის შესაძლებლობა ევლინებოდა. სამხრეთ სუდანში ადრეული ქორწინების ტრადიციით შეშინებული ადუთის ყველაზე დიდი მიზანი განათლების მიღება იყო.

„დედაჩემი მარტოხელა დედაა, მას ბევრი ადამიანი ჰყავდა სარჩენი, რაც ადვილი არ იყო. სკოლის ფული არ გვქონდა, ამიტომ ჩემი პირველი ემოციები, როდესაც ავსტრალიაში გადმოვედით, „ ეს ის ადგილია, სადაც სკოლა უფასოა და შევძლებ განათლება მივიღო?“ ძალიან მინდოდა და უბედნიერესი ვიყავი. შაბათ-კვირა არ მიყვარდა, რადგან სულ სკოლაში მინდოდა. დედას დავპირდი, რომ სკოლას აუცილებლად დავამთავრებდი და ეს ერთ-ერთი პირობაა, რომელიც შევასრულე.“

ადუთ აკეჩი ჟივანშის, ვერსაჩეს, ვალენტინოს, ალექსანდრ ვენგის, ვიქტორია ბექჰემის და შანელის ჩვენებებზე.

მოდელის კარიერაზე იმ დღიდან ოცნებობდა, როდესაც ალეკ ვეკის და ნაომი ქემბელის ფოტოები იხილა, არც სიმაღლე აკლდა და არც მოდელის ფიგურა, თუმცა საკუთარი თავის რწმენით ვერ დაიკვეხნიდა. პირველად პოდიუმზე დეიდამისის სამოყვარულო შოუში დადგა, როგორც ამბობს, მაშინ მიხვდა, რომ ეს ის არის რისთვისაც დაიბადა, სადაც თავს გრძნობს კომფორტულად.

„ძალიან მორცხვი ვარ, შეგიძლიათ შეამჩნიოთ, თუ ადამიანს კარგად არ ვიცნობ, საუბარიც მიჭირს. პოდიუმზე როცა ვდგები, სხვა პიროვნება ვხდები. სკოლაში ხშირად მეუბნებოდნენ, „მაღალი და გამხდარი ხარ, გრძელი ფეხები და მოდელის ფიგურა გაქვს, მოდელი უნდა გახდე,“ 15 წლის ასაკში სამოდელო სააგენტოში მივედი. ავსტრალიაში მოდის კვირეულებში ამიყვანეს, მელბურნში რამდენჯერმე გამოვედი. ერთხელ ჩემი აგენტი აღელვებული ხმით მირეკავს, ძლივს სუნთქავს, მეუბნება: „ახალი ფოტოები უნდა გადაგიღოთ და 3 დღეში პარიზში მიდიხარ, სან ლორანში უნდათ შენი ნახვა!“ იმედები არ დამიმყარებია, საკუთარი თავი უარისთვის მოვამზადე, ამას შევხედე როგორც პარიზში უფასოდ მოგზაურობას. “

სან ლორანმა ადუთი ექსკლუზიურად აიყვანა და ეს იყო მომენტი, როდესაც ყველამ იცოდა, რომ მოდას ახალი ვარსკვლავი ჰყავს – გოგონა სამხრეთ სუდანიდან, დევნილი, ემიგრანტი, ავსტრალიის მოქალაქე, მორცხვი ხასიათით, თუმცა ძლიერი სიარულის მანერით. 2016 წელს, როდესაც ამერიკაში ყველაზე განხილვადი თემა ემიგრანტებთან დაკავშირებით დონალდ ტრამპის პოლიტიკა იყო, ხოლო მოდაში – სოხუმელი ქართველი დევნილი ემიგრანტის, დემნა გვასალიას მონუმენტური დებიუტი ბალენსიაგაში, ადუთი თავისი ისტორიით, წარმომავლობით და ვიზუალით იყო სახე, რომელიც ირეკლავდა თანამედროვე კულტურას.

ადუთ აკეჩი სან ლორანის ჩვენებებზე

ერთ ჟურნალს მეორე მოსდევდა, კამპანიას – კამპანია, ჩვენებას – ჩვენება, 3 წელიწადში ადუთ აკეჩი გახდა სახე, რომელსაც ყველგან ვხედავდით და გვახსენდებოდა არამხოლოდ მისი პარამეტრები, რომელიც ძალიან გამორჩეული და თვალშისაცემია, არამედ მისი ისტორიაც.

„მსოფლიოში ყველაზე მდიდარი მოდელიც რომ გავხდე, მე ყოველთვის დევნილი ვიქნები. უამრავი აფრიკელი გოგონა მწერს, მეუბნებიან, რომ ჩემი წარმატებით მათი თავდაჯერებულობა და თვითშეფასება ავამაღლე.“

Vogue გერმანია სექტემბერი 2019


Vogue ბრიტანეთი სექტემბერი 2019


Vogue იაპონია სექტემბერი 2019


Vogue იტალია სექტემბერი 2019


Vogue ავსტრალია სექტემბერი 2019 (ციფრული)