Uswitch-ის ახალი კვლევის თანახმად, ინტერნეტში იმ ბრენდებს შორის, რომელთა გაყალბებულ პროდუქციასაც ყველაზე ხშირად ეძებდნენ, Rolex ლიდერობს. წლის განმავლობაში “ყალბი როლექსი” 228,000-ჯერ იყო საძიებო სისტემაში მოხვედრილი.
სიაში Rolex-ს Louis Vuitton მოსდევს, რომლის გაყალბებული ნაწარმიც 118,800-ჯერ იყო ონლაინ მოძიებული, მესამე ადგილს კი Gucci იკავებს – 87,600-იანი მაჩვენებლით.
ათეულში ასევე წარმოდგენილია: Yeezy (37,200), Crocs (25,200), Nike (22,800), Balenciaga (21,600), Off-White (20,400), Vans (15,600) და Adidas (14,400). ოცეულში კი გვხვდება: Converse, Chanel, Versace, Ray-Ban, Burberry, Prada, Michael Kors, Moncler, Calvin Klein და The North Face.

რაც შეეხება უშუალოდ პროდუქტს, ყველაზე ხშირად გუჩის ყალბი ქამარი იძებნებოდა (56,400). ყველაზე ხშირად მოძიებული ყალბი პროდუქტების ათეულში იტალიური ბრენდი კიდევ სამი ნივთით გვევლინება: “გუჩის ყალბი სლაიდებით” (სიაში მეორე ადგილი), “გუჩის ყალბი პერანგით” და “გუჩის ყალბი მაისურით.” ათეულში ასევე შესულია შემდეგი პროდუქტები: Yeezy Boost 350, Louis Vuitton-ის საფულე, Balenciaga-ს Triple S, Louis Vuitton-ის ქამარი, Yeezy SPLY 350 და Louis Vuitton-ის ზურგჩანთა.
ყველაზე მოთხოვნად გაყალბებულ ბრენდულ ჩანთებს შორის Louis Vuitton პირველ ადგილს იკავებს, მეორე, მესამე და მეოთხე პოზიციებს კი შესაბამისად Gucci, Prada, Chanel ინაწილებენ. მათ მოყვება: Michael Kors, Chloé, YSL, Celine, Hermès და Valentino.