მოდელობის მსურველთა რიცხვი ყოველწლიურად მატულობს. საკმარისია წარმოვიდგინოთ რამდენი გამორჩეული გარეგნობის ახალგაზრდაა მსოფლიოში, რათა გავიაზროთ თუ რამხელა კონკურენციასთან გვაქვს საქმე.
სიმაღლე, აღნაგობა, სახე, სიარული, თავდაჯერებულობა, კომუნიკაციის უნარი, გამოცდილება, წარმატების მისაღწევად ეს ყველაფერი, რა თქმა უნდა, ძალიან მნიშვნელოვანია, თუმცა არა – საკმარისი.
შეგვიძლია ვთქვათ, რომ თანამედროვე სამოდელო ბიზნესში, რამდენადაც მნიშვნელოვანია კარგი გარეგნული მონაცემები, იმდენად – პროფესიონალი აგენტი, რომელიც მოდელს საჭირო დროს, საჭირო ბრენდს წარუდგენს.
ხშირად, მოდელის კარიერის აღმავლობის დასაწყებად საკმარისია მხოლოდ ერთი შოუ. თვალი გადავავლოთ დღეს უკვე შემდგარ ტოპ მოდელებს, რომელთა კარიერა ერთმა კონკრეტულმა ჩვენებამ შექმნა.
ანა ევერსი
გერმანელი ტოპ მოდელი, რომელსაც ხშირად კლაუდია შიფერს ადარებენ, ალექსანდრ ვენგის აღმოჩენაა. 2014 წლის გაზაფხული/ზაფხულის სეზონზე, ანამ გახსნა Alexander Wang -ის შოუ. ამ ჩვენებამ ის მოდის საერთაშორისო რუკაზე განხილვად სახედ აქცია.
ჯოან სმოლსი
ჯოანის კარიერაში დიდი მომენტი დადგა მაშინ, როდესაც რიკარდო ტიშიმ ჟივანშის ექსკლუზიურ მოდელად აიყვანა. Givenchy-ის 2010 წლის გაზაფხული/ზაფხულის შოუ – ამ ჩვენებამ სმოლსი სუპერმოდელად შექმნა.
ადუთ აკეჩი
საკმარისია აღვნიშნოთ, რომ ადუთი, ნაომი ქემბელის შემდეგ, პირველი შავკანიანი მოდელია, რომელმაც ვოგის ოთხივე გავლენიანი გამოცემა დაამშვენა, რათა მის წარმატებულ კარიერას გავუსვათ ხაზი. ეს ყველაფერი კი, 2017 წლის გაზაფხული/ზაფხულის სეზონზე დაიწყო, როდესაც ბელგიელმა დიზაინერმა, ენტონი ვაკარელომ ადუთი სან ლორანის დებიუტანტ მოდელად შეარჩია.
კრისტინა გრიკაიტე
2017 წლის ზაფხულის სეზონზე მიუჩია პრადამ საზოგადოებას ახალი სახე, კრისტინა გრიკაიტე წარუდგინა. მას შემდეგ, გრიკაიტე მოდის საყვარელ ტოპ მოდელად იქცა.
ანოკ იაი
სამხრეთ სუდანელი მოდელის კარიერის აღმავლობაც პრადას სახელთანაა კავშირში. 2018 წლის გაზაფხული/ზაფხულის ჩვენებაზე, ანოკი, ნაომი ქემბელის შემდეგ, გახდა პირველი შავკანიანი მოდელი, რომელმაც პრადას შოუ გახსნა.
იმან ჰამამი
რიკარდო ტიშის კიდევ ერთი დიდი აღმოჩენა. 2013 წელს იმან ჰამამი შეირჩა ჟივანშის შოუს გამხსნელ მოდელად. როგორც ხშირად ამბობენ, დანარჩენი უკვე ისტორიაა.
