დავით გიორგაძე ბრიტანეთის მოდის საბჭომ 50 გამორჩეულ ახალგაზრდა შემოქმედს შორის დაასახელა

ბრიტანეთის მოდის საბჭო ყოველწლიურად ახალი შემოქმედებითი ტალანტების სიას აქვეყნებს. უკვე მეორედ, სიაში მოხვდა ქართველი ფოტოგრაფი დავით გიორგაძე.

დავითი საპატიო სიაში პირველად გასულ წელს, 100 ყველაზე ინოვაციურ და შთამაგონებელ ახალგაზრდა ტალანტს შორის მოგვევლინა. 2020 წელს ის კვლავ არის ახალი შემოქმედებითი ტალღის ნაწილი, ამჯერად სიის 50 მონაწილეს შორის.

View this post on Instagram

A post shared by Davit Giorgadze (@d.avit)

გიორგაძე რამდენიმე წელია გერმანიაში ცხოვრობს. მას არაერთ მნიშვნელოვან საერთაშორისო ბრენდთან უთანამშრომლია, რომელთა შორისაც არის: Burberry, Helmut Lang, Saint Laurent, Mugler, GmbH, Nina Ricci და ა.შ. მისი ფოტოები იბეჭდება ისეთ გავლენიან გამოცემებში, როგორებიცაა: CR Man, CR Fashion Book, Another Man, Dazed, INTERVIEW, The Face, Vogue და ა.შ. საქართველოში დავითი აქტიურად თანამშრომლობს ბრენდ Situationist – თან.

ბრიტანული მოდის საბჭოს მხრიდან ახალი შემოქმედების გამოვლენის ინიციატივა პირველად 2018 წელს გაჩნდა და მას შემდეგ მხარდაჭერას უცხადებს სხვადასხვა კრეატიული სფეროს წარმომადგენლებს: მწერლებს, არტისტებს, დიზაინერებს, ფოტოგრაფებს, სტილისტებს და ა.შ.

ბრიტანული ვოგის სიახლეების განყოფილების ხელმძღვანელი ოლივია სინგერი, რომელიც მოდის ინდუსტრიის სხვა წარმომადგენლებთან ერთად სიის ჩამოყალიბებაზე პასუხისმგებელი პირია, ამბობს:

„ამ წელს ძალიან ბევრი მნიშვნელოვანი კითხვა გაჩნდა მოდაში არსებულ ბარიერებთან დაკავშირებით, დაწყებული იქიდან თუ რამდენად ძვირი შეიძლება იყოს ამ სფეროში საქმიანობის დაწყება, განსაკუთრებით კი ფინანსური არასტაბილურობის დროს, დამთავრებული სისტემური რასიზმით – ამიტომ ახლა, განსაკუთრებით მნიშვნელოვანია ახალი ხმების ხელშეწყობა და მათი აქტიური მხმარდაჭერა.“