2023 წლის Super Bowl-ის შემდეგ, რიანამ კიდევ ერთი მუსიკალური შოუ გამართა, თუმცა ეს არა მისი კონცერტი, არამედ ქორწილში ჰონორარის სანაცვლოდ გამართული პერფორმანსი იყო და მას მხოლოდ ცერემონიაზე მიწვეული სტუმრები ესწრებოდნენ. საქმე ის არის, რომ რიანა ინდოეთის ყველაზე მდიდარმა ბიზნესმენმა – მუკეშ ამბანმა დაიქირავა, რათა მომღერალს მისი უმცროსი შვილის საქორწილო ცერემონიის წინ გამართული წვეულება მუსიკალურად გაეფორმებინა. რიანას მუსიკალური პერფორმანსი საკმაოდ დიდხანს გრძელდებოდა და მის არაერთ ცნობილ ჰიტს მოიცავდა. დასახელდა ჰონორარის მოცულობაც, რომელიც მომღერალმა ამ წვეულებაზე სიმღერისათვის მიიღო. ამბანების ოჯახმა რიანას 6 მილიონ დოლარზე მეტი გადაუხადა.
რაც შეეხება თავად ამბანებს, მუკეშ ამბანი ინდოეთში ყველაზე მდიდარი, ხოლო მსოფლიოში ერთ-ერთი ყველაზე მდიდარი ადამიანია. Forbes-ის მიხედვით, მისი ქონება 116 მილიარდი დოლარია. მუკეშ ამბანი Reliance Industries-ის მფლობელია და სოლიდური წილები აქვს კავშირგაბმულობის, ნავთობის, ბუნებრივი აირის და საფინანსო ბიზნესში.
ამბანების ოჯახი ცნობილია მასშტაბური და დიდი წვეულებებით. ეს იგივე გვარია, რომელმაც 2018 წელს ოჯახის სხვა წევრისათვის გამართულ ქორწილში მომღერლად ბიონსე მიიწვიეს. აღნიშნულ ქორწილში ამბანებმა 100 მილიონი დოლარი დახარჯეს.
რაც შეეხება უმცროსი ვაჟის ქორწილს, რიანასთან ერთად მას ბიზნესის და შოუბიზნესის უამრავი ცნობილი წარმომადგენელი ესწრებოდა. სტუმრებს შორის იყვნენ: მარკ ცუკერბერგი, ბილ გეიტსი, ასევე Disney-ის ხელმძღვანელი ბობ აიგერი.
