2015 წლიდან თბილისის მერსედეს-ბენც მოდის კვირეული წელიწადში ორჯერ, რამდენიმე დღით საქართველოში თავს უყრის უცხოური მედიის წარმომადგენლებსა და ბაიერებს, რომლებიც ადგილობრივ ტალანტებს გლობალურ აუდიტორიას აცნობენ და წვლილი შეაქვთ მათ კომერციულ წარმატებაში. მოდის დიზაინერებისთვის და სხვა კრეატიული სფეროების წარმომადგენლებისთვის ეს არის პლატფორმა, რომელსაც მათთვის, უპირველესყოვლისა, ხილვადობა და სხვა არაერთი სარგებელი მოაქვს. თბილისის მერსედეს-ბენც მოდის კვირეული Covid-19-ის პანდემიის დაწყების შემდეგ მთლიანად ციფრულად ორჯერ ჩატარდა, რასაც დროებითი პაუზა მოჰყვა. ამ პერიოდმა ქვეყანაში პროექტის საჭიროება მკაფიოდ გამოკვეთა და საქართველოსთვის ყველაზე მნიშვნელოვანი მოდური ღონისძიება სიახლეებით ისევ ბრუნდება.
თბილისის მერსედეს-ბენც მოდის კვირეულის 2023 წლის შემოდგომა/ზამთრის სეზონის ოფიციალურ განრიგში ისეთ ნაცნობ ბრენდებთან და დიზაინერებთან ერთად, როგორებიცაა: Situationist, Keburia თუ Ingorokva, გვხვდება არაერთი ახალი სახელიც. კვირეულში ქართველ დიზაინერებთან ერთად მონაწილეობას მიიღებენ უცხოელი ტალანტებიც.
ღონისძიების მნიშვნელოვანი ნაწილი იქნება 2010 წელს დაარსებული საერთაშორისო კონკურსი BeNext, რომელიც დამწყებ დიზაინერებს განვითარების არაჩვეულებრივ შანსს აძლევს. წლევანდელი კონკურსი გამორჩეული იქნება როგორც ჟიურის შემადგენლობით, ისე პრიზებით, რომელთა შორისაც არის: საზღვარგარეთ სწავლა, კოლექციის დაფინანსება, სხვადასხვა საერთაშორისო პროექტში მონაწილეობა და ა.შ. ჟიურის წევრებს შორის კი იქნებიან: მიკი ბორდმენი, დაიან პერნე, ლინდა ლოპა. კვირეული 4 მაისს სწორედ BeNext-ში მონაწილე დიზაინერების ნამუშევრების პრეზენტაციით გაიხსნება.
საერთაშორისო პრესის მხრიდან დაინტერესება თბილისის მერსედეს-ბენც მოდის კვირეულის მიმართ კვლავ დიდია. მას 40-მდე გამოცემის წარმომადგენელი დაესწრება. თბილისს ასევე ეწვევიან ბაიერები ისეთი სახელგანთქმული სავაჭრო სივრცეებიდან, როგორებიცაა: Bergdorf Goodman, Neiman Marcus, Samaritaine და ა.შ.
“პანდემია, ომი უკრაინაში, საქართველოში მიმდინარე პროცესები, ამ ყველაფრის გამო რთული იყო კვირეულის ჩატარება, მაგრამ ბევრი ფიქრის შემდეგ მივხვდით, რომ ეს პროექტი არ არის მარტო მოდა. ეს არის პლატფორმა, რომელიც, პირველ რიგში, სჭირდება ქვეყანას და ნიჭიერ ადამიანებს კრეატიული ინდუსტრიიდან,” – ამბობენ პროექტის ორგანიზატორები მისი გაგრძელების გადაწყვეტილების მიღების მიზეზებზე საუბრისას.
თბილისის მერსედეს-ბენც მოდის კვირეული 8 მაისის ჩათვლით მოეწყობა და მის ფარგლებში დაგეგმილი ჩვენებებისა და აქტივობების ჩატარების ძირითადი ადგილი Factory Tbilisi იქნება.
