სამწლიანი პაუზის შემდეგ, Mercedes-Benz Fashion Week Tbilisi დაბრუნდა და სტუმრებს, როგორც კარგად ცნობილი დიზაინერების ახალი კოლექციები, ისევე ახალი, საინტერესო სახეები გააცნო. 2023 წლის შემოდგომა-ზამთრის სეზონი 4-8 მაისს, მულტიფუნქციურ სივრცეში, The Factory-ში გაიმართა, სადაც სტუმრებს შესაძლებლობა ჰქონდათ ენახათ კოლექციები, გამოფენები, დასწრებოდნენ ღონისძიებებს და რა თქმა უნდა, წარმოეჩინათ ინდივიდუალური სტილი ფოტოგრაფების ობიექტივში.
ტრადიციულად, მოდის კვირეულებზე, კოლექციების პარალელური ყურადღება ფოკუსირებულია ქუჩის სტილზე, რომლითაც თბილისის MBFW, წლების განმავლობაში, საერთაშორისო გამოცემებისთვის ერთ-ერთ გამორჩეულ ქალაქად იქცა. 2015 წლიდან, თბილისის მთავარი მოდური ღონისძიების ქუჩის სტილზე წერდნენ ისეთი გამოცემები, როგორებიცაა: Vogue, W Magazine, BOF, WWD და ა.შ. ამასთან, ისინი გზავნიდნენ ქუჩის სტილის ცნობილ ფოტოგრაფებს, Style Du Monde-სა და ადამ კაც სინდინგს, აშუქებდნენ საუკეთესო ლუქებს და ადარებდნენ მათ სეულსა და სტოკჰოლმს.
ქუჩის სტილი საინტერესოა იმით, რომ მოდის კვირეული აერთიანებს ადამიანებს ყველა სფეროდან, რა თქმა უნდა, პირველ რიგში – მოდის ინდუსტრიიდან პრესამდე, შემდეგ – ადამიანებს ბიზნეს სექტორიდან, მყიდველებს (ე.წ. ბაიერებს), მენეჯერებს, ხელოვანებს, ინფლუენსერებს და ა.შ. ეს გვაძლევს საშუალებას ვიხილოთ, როგორც ფორმალური სამოსის პიროვნული ინტერპრეტაცია, ისე ყოველდღიური, საღამოს, თუ სხვა ღონისძიებებისთვის შესაფერისი ასობით კომბინაცია, რომელიც გვეხმარება მოდას და მასში მიმდინარე ტრენდებს მესამე თვალით შევხედოთ.
MBFW თბილისის 2023 წლის შემოდგომა/ზამთრის სეზონს Fashionholics Online გადახდების სფეროში ერთ-ერთ წამყვან კომპანიასთან, Mastercard-თან ერთად აშუქებს. თბილისის MBFW-ზე მისული სტუმრების Street Style ფოტოები Fashionholics Online x Mastercard-ის თანამშრომლობის ფარგლებში, სააგენტომ “იდეაში-Ideashi” გადაიღო.
თბილისში გამოიკვეთა როგორც მსოფლიოში პოპულარული მოდური ტენდენციები, ისევე ადგილობრივი და ქვეყნისთვის დამახასიათებელი, ინდივიდუალური სტილი. ვერცხლისფერი და რუხი ფერები, რომლებიც მსოფლიო პოდიუმებზე 2023 წლის გაზაფხული/ზაფხულის სეზონზე ვიხილეთ, ახლა ქუჩის სტილის წამყვანი ტონალობებია. იქნება ეს ვერცხლისფერი “ბომბერ” ჟაკეტი თუ ტოტალური რუხი, კონსერვატიული ლუქი, აღნიშნული ფერები მიმდინარე სეზონის ნომერი პირველი ტრენდია. მსოფლიოში პოპულარული ტრენდებიდან, რომლებიც თბილისშიც გამოიკვეთა, აღსანიშნავია დენიმის ვარიაციები და “Denim on Denim” ტენდენცია. უცნაური, გამორჩეული ჯინსის შარვლები და ქურთუკები ამ სეზონის ნამდვილი ჰიტია, რაც თბილისის მერსედეს ბენცის მოდის კვირეულზეც ვიხილეთ. რაც შეეხება თბილისისთვის დამახასიათებელ, უკვე ტრადიციად ქცეულ შავ ფერს, 2023 წლის შემოდგომა/ზამთრის სეზონის ქუჩის სტილი ამ მხრივ გამონაკლისი არ ყოფილა. კვირეულზე მისულ სტუმრებს ეცვათ შავი ფერის ყველაფერი – პიჯაკისა და შარვლის სეტები, ქვედაბოლოები, ასიმეტრიული მოსაცმელები…
იხილეთ ფოტოები:
ფოტოგრაფები: ანრი შარაშენიძე და გიორგი შერვაშიძე (“იდეაში-Ideashi”)
