განახლება (6.05.2024 16:42): Cavea-ს ოფიციალურ გვერდზე 6 მაისის 16:29 წუთზე გამოქვეყნდა პოსტი, რომლის თანახმადაც, ფილმი Cavea-ს კინოთეატრებში 30 მაისიდან გავა. Cavea Cinemas-ს წარმომადგენლები ჩვენთან საუბრისას აღნიშნავენ: “ფილმის “მეტოქეები” (Challengers) პრემიერა ჩვენს კიმოთეატრებში შედგება 30 მაისს. საქართველოში განვითარებული მოვლენებიდან გამომდინარე და მათ შორის, ამ პერიოდში, კინოთეატრებში დასწრების დაბალი მაჩვენებლის გათვალისწინებით, სტუდიებთან კონსტულტაციით, გადაიხედა საპრემიერო ბადე. პრემიერის თარიღის ცვლილება მიღებული პრაქტიკაა.”
26 აპრილს მსოფლიო კინოთეატრების ეკრანებზე ლუკა გუადანინოს ახალი სპორტული დრამა – Challengers გამოვიდა. კინოსურათი 2024 წლის ერთ-ერთი ყველაზე ხმაურიანად დაანონსებული ფილმია და მას მაყურებელი თვეების განმავლობაში ელოდა. მიუხედავად იმისა, რომ Challengers ქართულ კინოთეატრებშიც უნდა გასულიყო, ფილმი მიმდინარე და დაანონსებულ ჩვენებებს შორის აღარ არის. მიზეზის გასარკვევად მივმართეთ Cavea-ს წარმომადგენლებს, თუმცა ზუსტ მიზეზი ჩვენთვის ამ დრომდე უცნობია.
ფილმი სასიყვარულო სამკუთხედის ირგვლივ ვითარდება და ბევრ ინტიმურ სცენას შეიცავს, თუმცა მას ეროტიკის ჟანრის სტატუსი არ აქვს და მსოფლიოს კინოთეატრებში სტანდარტულად აჩვენებენ. ასევე აღსანისშნავია ისიც, რომ ფილმი გარკვეულწილად LGBT თემატიკასაც ეხება. გამოქვეყნებული რეცენზიების მიხედვით, Challengers ამ მომენტისათვის ერთ-ერთ იმ ფილმად მიიჩნევა, რომელიც სავარაუდოდ ოსკარის ნომინანტთა შორის მოხვდება.
