გასულ კვირას ცნობილი გახდა, რომ სილამაზის ინდუსტრიის წამყვანი კონგლომერატი, „ესტე ლაუდერი“ თავის პატარა, თუმცა საკმაოდ ცნობილ ბრენდს, Becca Cosmetics -ს ხურავს. კორონავირუსის პანდემიით გამოწვეული კრიზისის ფონზე, კიდევ ერთი დახურული ბიზნესის შესახებ სიახლე არავის გვაკვირვებს, თუმცა უნდა ითქვას, რომ Becca Cosmetics -ის ფინანსური პრობლემები მხოლოდ მომენტის გლობალურ გამოწვევებს არ უკავშირდება.ამ შემთხვევაში, პანდემიამ უბრალოდ დააჩქარა პროცესები. სწორედ ამიტომ, საინტერესოა, რა მოხდა 2010-იანი წლების ერთ-ერთ საყვარელ ნიშურ ბრენდში, რომელიც „ესტე ლაუდერის“ დიდი ოჯახის წევრი მხოლოდ 5 წლის წინ გახდა.
როგორც უკვე ითქვა, „ესტე ლაუდერმა“ Becca Cosmetics 2016 წელს შეიძინა. იმ დროისთვის, „ბეკა“ შეფასებული იყო, როგორც 200 – 300 მილიონიანი ბიზნესი. მოგვიანებით, კონგლომერატმა კიდევ ერთი დიდი ინვესტიცია განახორციელა და 1.4 მილიარდ დოლარად ‘Too Faced’-ის კოსმეტიკური ბრენდიც შემოიერთა. როგორც უენდი ლიბმენი, WSL Strategic Retail-ის გენერალური დირექტორი, აღნიშნავს, 2010-იანი წლების დასაწყისში, როდესაც სილამაზის ინდუსტრია სოციალური ქსელების დახმარებით ახალ მწვერვალებს იპყრობდა, 300 მილიონი დოლარის ინვესტიცია, პოტენციალის მქონე პატარა ბრენდში, მოსალოდნელი იყო, თუმცა არა გამართლებული.
The Estée Lauder Companies -ისთვის ცნობილი იყო, რომ Becca Cosmetics-ის მყიდველების უმრავლესობას ჩრდილოეთ ამერიკაში და ევროპაში მცხოვრები ფერადკანიანი მოსახლეობა წარმოადგენდა. არა-თეთრკანიანი მყიდველების განსაკუთრებული აქტიურობა იმით აიხსნებოდა, რომ სხვა კომპანიებისგან განსხვავებით, ეს ბრენდი სახის პალეტების, ტონალური კრემების, ბრონზერების და ჰაილაითერების დიდ არჩევანს ქმნიდა. „ესტე ლაუდერში“ დაინახეს შესაძლებლობა, რომ Becca Cosmetics განვითარებულიყო, როგორც მრავალფეროვანი ბრენდი, თუმცა მიმზიდველი იდეა მაშინ დადგა გამოწვევის წინაშე, როდესაც რიანამ და ცნობილმა კონგლომერატმა, LVMH -მა ახალი ბრენდი – “Fenty Beauty” წარადგინეს. ეს კი Becca Cosmetics-ის და Estée Lauder-ის გარიგებიდან მხოლოდ ერთ წელში მოხდა.
დაარსებიდან „ფენტი ბიუთი“ პოზიციონირდა, როგორც კოსმეტიკური ხაზი ყველა კანის ფერის მქონე ქალისთვის. LVMH-მა ‘Fenty Beauty’-ის მიზნობრივ აუდიტორიად სწორედ ფერადკანიანი მოსახლეობა აირჩია და მრავალფეროვნება წარმატების მთავარ ფორმულად აქცია. ამასთან ერთად, მათ ჰყავდათ რიანა – პოპ-კულტურის ერთ-ერთი ყველაზე გავლენიანი ფერადკანაინი ვარსკვლავი. შედეგად, ზრდის პოტენციალის მქონე პატარა ბრენდი, რომელიც იმედებს ინფლუენსერებზე და სოციალურ მედიაში აქტივობებზე ამყარებდა, თანამედროვე მოდის და მუსიკის ერთ-ერთ ყველაზე დიდ ინფლუენსერთან კონკურენციაში აღმოჩნდა, რაც საბოლოოდ, Becca-ს მარცხით დასრულდა.
Fenty Beauty
Estée Lauder-ში შესწევდათ ძალა, რომ „ბეკას“ განახლებაში და პიარში უფრო დიდი რესურსები მიემართათ, თუმცა მათ ეს არ გააკეთეს. შეგვიძლია ვთქვათ, რომ კონგლომერატმა ბრენდი საკმაოდ მარტივად დათმო, რაც აჩენს დამატებით კითხვებს, მითუმეტეს მაშინ, როდესაც ცოტა ხნის წინ, კიდევ ერთი სიახლე გავრცელდა იმის თაობაზე, რომ პანდემიური კრიზისის გადალახვის პროცესში, „ესტე ლაუდერი“ 2.2 მილიარდ დოლარად ყიდულობს Deciem-ს, კანის მოვლის ბიუჯეტური ბრენდის, ორდინარის მშობელ კომპანიას. ამ გადაწყვეტილების უკეთ გასააზრებლად საკმარისია თვალი გადავავლოთ ბოლო რამდენიმე წლის სტატისტიკას.
2019 წელს, პანდემიამდე, სილამაზის ინდუსტრიის 15% ეკავა დეკორატიულ კოსმეტიკას, უფრო ნაკლები, ვიდრე კანის მოვლის საშუალებებს. 2021 წლისთვის კოსმეტიკაზე მოთხოვნა იკლებს, თუმცა კანის და თმის მოვლის საშუალებებზე იმატებს. 2020 წელს, პანდემიურ რეალობაში, „ესტე ლაუდერის“ მფლობელობაში მყოფი კოსმეტიკური ბრენდების გაყიდვები 18%-ით შემცირდა, რაც საგრძნობლად დრამატული ვარდნაა კანის მოვლის საშუალებების გაყიდვებთან შედარებით. სხვა სიტყვებით რომ ვთქვათ, როგორც სტაბილურ, აგრეთვე კრიზისულ პერიოდებში, კანის მოვლის ბრენდები უკეთესს შედეგს აჩვენებენ, ვიდრე დეკორატიული კოსმეტიკის ხაზები.
მოვლენების ამგვარ განვითარებას არავინ ელოდა, მითუმეტეს 2010-იანების დასაწყისში, თუმცა ზემოთხსენებულიდან ცხადია, რომ Becca არ იქნება უკანასკნელი ნიშური ბრენდი, რომელიც დიდ კონგლომერატში და კონკურენციაში ადგილს ვერ შეინარჩუნებს.
