2022 წლის მიწურულს და 2023 წლის დასაწყისში, ერთ-ერთი ყველაზე აქტუალური შოუ The White Lotus იყო. ის HBO-ს ერთ-ერთ ჰიტად იქცა და არაერთი ნაცნობი, თუ ახალბედა მსახიობი ვარსკვლავად აქცია. გარდა სიუჟეტისა და სამსახიობო შემადგენლობისა, სერიალის ერთ-ერთ მთავარ დამახასიათებელ ნიშად პეიზაჟები და გარემო იქცა. სერიალის სეზონების მიხედვით იცვლებიან გმირები და იცვლება ისტორიები, თუმცა მუდმივი რჩება ერთი დეტალი – სასტუმროს ბრენდი – The White Lotus. ყოველ სეზონში მოქმედება ამ სასტუმროს სხვადასხვა ფილიალში ვითარდება, შესაბამისად, ახალი სეზონის დაანონსებისას, მაყურებლის მღელვარებას არა მხოლოდ სამსახიობო შემადგენლობა და გმირები იწვევენ, არამედ – ლოკაცია, სადაც მოქმედება უნდა განვითარდეს.
ახლახან ცნობილი გახდა ადგილი, სადაც The White Lotus-ის მესამე სეზონის სიუჟეტი განვითარდება. გმირები ამჯერად ეგზოტიკურ ტაილანდში მდებარე ფილიალს ესტუმრებიან. მიუხედავად იმისა, რომ ეს სიახლე ოფიციალურად არ დაანონსებულა, ინფორმაცია გავლენიანმა გამოცემა Variety-მ ექსკლუზიურად გაავრცელა. როგორც მედია მედია იუწყება, გადაღებები ტაილანდის ერთ-ერთ ძვირადღირებულ სასტუმროში სულ მალე დაიწყება.
