სეზონის ყველაზე დამაინტრიგებელი დებიუტი შედგა. ბრიტანელი დანიელ ლი ბოთეგა ვენეტას ახალი შემოქმედებითი ხელმძღვანელია. 5 წლის განმავლობაში, დენიელი სელინის სტუდიის ხელმძღვანელი იყო, მაშინ, როდესაც ბრენდის შემოქმედებით დირექტორად ფიბი ფაილო გვევლინებოდა. ფაილოს და სელინის მტკივნეული განშორების შემდეგ, დენიელის ბოთეგა ვენეტაში დანიშვნამ, უმალვე გამოიწვია ჭორები იტალიური ბრენდის მფლობელი კომპანიის, Kering-ის ეშმაკურ განზრახვებზე, თუმცა დღეს დანიელმა ბოთეგა ვენეტაში თავისი პირველი კოლექციით მნიშვნელოვანი განაცხადი გააკეთა, რომ ბოთეგა ვენეტა არ არის მხოლოდ სელინი და მას ბრენდში საკუთარი სათქმელი აქვს.
საინტერესო იყო მამაკაცის ხაზი. შეუძლებელია რიკ ოუენსის და ჰელმუტ ლენგის გავლენა არ აღვნიშნოთ, თუმცა იშვიათია, რომ რიკ ოუენსი, თავად რიკის გარდა, ვინმეს კარგად გამოსდიოდეს. დანიელმა შეძლო.
შესამჩნევი იყო ტომ ფორდის გუჩიც.
შესაძლოა დანიელის კოლექცია არ ყოფილა ემოციური, ან რევოლუციური, მაგრამ მოულოდნელობა სახეზეა. თუ გავითვალისწინებთ როგორი პროგნოზირებადი გახდა ყველა დებიუტი, მინიმალური გაკვირვებაც კმარა, რომ ვთქვათ, მოდის საერთაშორისო რუკაზე ახალი საინტერესო დიზაინერი გამოჩნდა.
