ერთადერთი ადამიანი, ვინც გასული 3 ათწლეულია ყველა ჩვენებას მზის სათვალით აკვირდება, ღამით, თუ დღისით, ვოგის ლეგენდარული რედაქტორი, ანა ვინტურია. სიმბოლურია, რომ ბალენსიაგას 2021 წლის ზაფხულის Pre-კოლექცია, რომლის მთავარი ღირსება მარტივ, თუმცა ეფექტურ კონცეფციასთან ერთად, ლოიკ გომეზის მიერ შესრულებული საუნდტრეკი, “Sunglasses At Night” იყო, ვინტურმა დააანონსა.
კანადელი მუსიკოსის, Corey Hart – ის 80-იანი წლების ჰიტის ქავერზე, დემნა გვასალიამ ბალენსიაგას „ახალი“ კოლექცია პარიზის ქუჩებში წარადგინა. ახალი ბრჭყალებში, რადგან ქართველმა დიზაინერმა ბალენსიაგას კალენდარი კიდევ ერთხელ შეცვალა. დემნამ 2021 წლის გაზაფხული/ზაფხულის მოდის კვირეულზე, მთავარი RTW კოლექციის ნაცვლად, წინა სეზონის გაგრძელება, “Pre-Summer 2021” შემოგვთავაზა. გვასალიამ ცვლილების შესახებ სიახლე ჯერ კიდევ 2 კვირის წინ, WWD – ისთან ინტერვიუში გააჟღერა. როგორც ცნობილია, “Ready To Wear” ხაზის მთავარ კოლექციას Balenciaga დეკემბერში წარადგენს.
ცვლილებების განხორციელებაში კორონავირუსის პანდემიამ აღსანიშნი როლი ითამაშა, თუმცა ქართველი დიზაინერი კოლექციების წარდგენის ახალ მოდელზე გასული წლიდან ფიქრობდა.
დემნა გვასალია:
„ჩემს თანამედროვე აუდიტორიას ნამდვილად არ უნდა ჩაიცვას, როგორც დიდგვაროვანმა, რომელიც კრიკეტის საყურებლად მიდის. ჩემი მიდგომა მოდისადმი დაფუძნებული სამოსის ანთროპოლოგიაზე, დრეს კოდებზე და იმაზე, თუ როგორ არჩევანს აკეთებენ “ქვეითები” ჩაცმისას. ქუჩის კულტურა უფრო მეტად შთააგონებს ჩემს შემოქმედებას, ვიდრე რომელიმე წარმოსახვითი ელიტისტური იდეა იმაზე, თუ როგორი “უნდა” იყოს მოდა – იდეა, რომელიც ვიღაცამ 50 წლის წინ განსაზღვრა.
ეს არის გზავნილი მოდისგან, რომელიც წინ მიიწევს, იწყებს ახალ მოგზაურობას ღამის სიბნელეში. ეს არის იმედის და წინსვლის გზავნილი, მიუხედავად იმისა, რომ ამ კონკრეტულ დროს ზუსტად არ ვიცით საით მივდივართ.
არასდროს მსიამოვნმებდა მოდის მთელი ეს ცირკი თავისი ზედაპირული ხასიათით. ამიტომ ჩემთვის რთულია მოდის ეს მხარე მომენატროს. თუმცა, მენატრება რეალურ ცხოვრებაში ადამიანებთან თვალით კონტაქტი, მენატრება ჩემი გუნდი – მათი სახეების დანახვა ნიღბების გარეშე, მენატრება იმ ადამიანებთან საუბარი, რომლებიც ჩემს ტანისამოსს ატარებენ. მენატრება მღელვარება შოუმდე 5 წუთით ადრე. არის ჩვენი ცხოვრების ასპექტები, რომლებსაც ვერ ჩავანაცვლებთ მობილური მოწყობილობებით და ვიდეო ზარებით, – ეს არის ძირითადი ასპექტები, რომლებიც ჩვენს ადამიანურ ყოფას განსაზღვრავს. ერთი სული მაქვს როდის დავუბრუნდები ამ მდგომარეობას, იმედი მაქვს – ახლო მომავალში“.
ბალენსიაგას ახალ პროექტში მონაწილეობა მიიღო ქართველმა მოდელმა, მარიშა ურუშაძემ, რომელიც წარულში გუჩის, მუგლერის და სხვა ცნობილი ბრენდების მოდელი გახლდათ. აღსანიშნავია, რომ მარიშამ ბალენსიაგასთან პირველად ითანამშრომლა.
Balenciaga Summer 2021 Pre-Collection
შემოქმედებითი ხელმძღვანელი: Demna Gvasalia
დიზაინ სტუდიის დირექტორი: Martina Tiefenthaler
მოდის რედაქტორი / სტილისტი: Laëtitia Gimenez
რეჟისორი: Walter Stern
ორიგინალი მუსიკის ქავერი: BFRND
ვიზაჟისტი: Inge Grognard
ვარცხნილობის სტილისტი: Holli Smith
