თუ კინომოყვარული ხართ, აუცილებლად გაიხსენებთ რამდენიმე ტრენდს, რომლებიც არაერთ ფილმში მეორდება – დაწყებული კოლეჯში ახლადგადასული მთავარი გმირიდან, დასრულებული ქარიზმატული და სარკასტული დეტექტივით, რომელიც დანაშაულს  დედუქციის განსაკუთრებული უნარის მეშვეობით ხსნის. რეჟისორების, სცენარისტების და კინოსტუდიების საყვარელ ტრენდებს განეკუთვნება მძაფრსიუჟეტიანი ფილმები ქალ აგენტებზე. ჯაშუში ქალები განსაკუთრებულ ფიზიკურ და გონებრივ მონაცემებს ფლობენ. მსგავსი სიუჟეტის კინოსურათების შემქმნელები მედიასთან საუბრისას ყურადღებას ამაყად ამახვილებენ ფემინისტურ განაცხადზე.  ამის საპირისპიროდ არსებობს მოსაზრება, რომ სწორედ მსგავსი ფილმები აჩენს გარკვეულ გენდერულ სტერეოტიპებს – ამ ტიპის ფილმებში აქცენტი მთავარი გმირების გარეგნობაზე, მათ ლამაზ სხეულზეა გაკეთებული და რაც ყველაზე შესამჩნევია – პერსონაჟები ყოველთვის იყენებენ, ან იძულებულნი არიან გამოიყენონ გარეგნული მონაცემები იმისათვის, რომ რთულ დავალებას თავი გაართვან. 

ასეა თუ ისე, შესაძლოა ჯაშუშ ქალებზე გადაღებული ფილმები დიდი მხატვრული ღირებულებებით და მიღებული ჯილდოებით არ გამოირჩეოდეს, თუმცა, საკმაოდ პოპულარულია და კინოგაქირავების დამაკმაყოფილებელ შედეგებსაც აღწევს. 

გავიხსენოთ 5 ფილმი, რომლებშიც სიუჟეტი ჯაშუში ქალის/ ქალების ირგვლივ ვითარდება.

Charlie’s Angels

“ჩარლის ანგელოზები“ სერიალის სახით 1976 წელს გამოჩნდა. თუმცა, სატელევიზიო შოუსთან შედარებით, გაცილებით  პოპულარული მისი კინოვერსიებია. პირველი ფილმის პრემიერა 2000 წელს შედგა, მეორე ნაწილი კი, კინოგაქირავებაში 2003 წელს ჩაეშვა.  McG-ის რეჟისორობით გადაღებულ მძაფრსიუჟეტიან კომედიაში მთავარ როლებს დრიუ ბერიმორი, კამერონ დიასი და ლუსი ლუ ასრულებენ. გარდა ანგელოზების შემსრულებლებისა, სამსახიობო შემადგენლობამ ისეთი ცნობილი ვარსკვლავები გააერთიანა, როგორებიც არიან ბილ მიურეი, დემი მური. 16 წლის შემდეგ, 2019 წელს ჩარლის ანგელოზების ახალი ვერსია გამოვიდა. კინოსურათში აგენტი ანგელოზების როლი ამჯერად კრისტენ სტიუარტმა, ნაომი სკოტმა და ელა ბალინსკამ მოირგეს. ახალი ვერსიის რეჟისორი ელიზაბეთ ბენკსია.

Anna 

ლუკ ბესონის ჯაშუში ქალი გმირების მიმართ სიყვარულში მარტივად დარწმუნდებით, თუ მის ფილმოგრაფიას გადახედავთ. 2019 წლის მძაფრსიუჟტიან ტრილერში, სახელწოდებით Anna მთავარ როლს რუსი მოდელი საშა ლუსი ასრულებს. კინომიმომხილველმა მედიაგამოცემებმა ფილმი ბესონის 2014 წლის კინოსურათის Lucy-ის ერთგვარ სტილისტურ გაგრძელებად მიიჩნიეს. 

Red sparrow

Anna-ს მსგავსად, ეს ფილმიც რუსი აგენტი ქალის ისტორიას გვიჩვენებს .ფრენსის ლოურენსის მძაფრსიუჟეტიანი ტრილერი, დრამა  – Red Sparrow 2018 წელს გამოვიდა. მთავარი გმირს ოსკაროსანი მსახიობი – ჯენიფერ ლოურენსი ასრულებს.

Salt

ფილიპ ნოისის 2010 წლის ტრილერმა ამ ხუთეულის სხვა ფილმებისგან განსხვავებით, ოსკარის ნომინაციაც კი მიიღო. თუმცა, ნომინაციას არაფერი აქვს საერთო რეჟისურასთან ან სცენართან – ამერიკის კინოაკადემიამ კინოსურათი ხმის ეფექტების კატეგორიაში წარადგინა. Salt-ში მთავარ როლს ანჯელინა ჯოლი ასრულებს. აღსანიშნავია, რომ ეს პირველი შემთხვევა არ არის, როცა მაყურებელმა ჯოლი საიდუმლო აგენტის როლში იხილა.

 Atomic Blonde

დეივიდ ლეიჩის 2017 წლის ნამუშევარში მთავარ როლს ოსკარის მფლობელი მსახიობი შარლიზ ტერონი ასრულებს. სცენარის მიხედვით, მოქმედება ბერლინში ვითარდება. ფილმში შარლიზ ტერონს პარტიორობას მსახიობი ჯეიმს მაკევოი უწევს