2021 წლის Met Gala-ზე არაერთი ორიგინალური და რიგ შემთხვევებში, მოულოდნელი გადაწყვეტა ვიხილეთ. მიწვეულ სტუმრებს შორის გამოირჩეოდნენ Rihanna და რეპერი A$AP Rocky, რომლებიც არაერთმა გამოცემამ კოსტიუმირებული მიღების საუკეთესოდ ჩაცმულ წყვილადაც დაასახელა.
რიანამ Balenciaga ჩაიცვა – კოსტიუმი, რომელიც დემნა გვასალიას ოტ კუტიურ სადებიუტო კოლექციის ერთ-ერთი მოდელია. რაც შეეხება A$AP Rocky-ის, რეპერი წითელ ხალიჩაზე ფერადი ხელნაკეთი გადასაფარებლით გამოჩნდა. 2021 წლის “მეტ გალას” თემა ამერიკული მოდა იყო, ამიტომ საერთაშორისო პრესამ ტექსტილის ხელნაკეთი დეტალი კონცეპტუალურად გამართლებულად მიიჩნია, რადგან ის დიზაინში ტრადიციულ ღირებულებებს უსვამდა ხაზს. თუმცა, როგორც აღმოჩნდა, A$AP Rocky-ის ეს იმიჯი იმაზე პერსონალურ და საინტერესო ისტორიას ატარებს, ვიდრე ეს ერთი შეხედვით ჩანს. მეტროპოლიტენის მუზეუმის სანახაობრივი ღონისძიებიდან რამდენიმე დღეში, ინსტაგრამის ერთ-ერთმა მომხმარებელმა სოციალურ ქსელში დაწერა, რომ Met Gala-ს ფოტოებზე აღბეჭდილი ნაჭრის დეტალი მისი დიდი ბებიის შეკერილი იყო. მტკიცებულების სახით, მან ძველი ფოტოც გამოაქვეყნა, რომელშიც გარკვევით ჩანს საწოლზე გადაფარებული იდენტური ტექსტილი. როგორც გაირკვა, მისმა შემქმნელმა ის ერთ-ერთ ვინტაჟურ მაღაზიას საქველმოქმედო შემოწირულობის სახით გადასცა.
