თუ გავიხსენებთ ცნობილ ადამიანებს, რომლებზეც შეგვიძლია ვთქვათ, რომ უნიკალური და დამახასიათებელი სტილი აქვთ, ერთ-ერთი მათ შორის უდავოდ არის ანა ვინტური. თუმცა, როგორც აღმოჩნდა, მაინც არიან ადამიანები, რომლებმაც მოდის სამყაროს ყველაზე გავლენიანი ქალი, შესაძლოა, ვერ იცნონ. ინტერნეტში ვირუსულად გავრცელდა ვიდეო, რომელშიც ჩანს ვინტურის რეაქცია, როდესაც მას თეატრში შესასვლელად პირადობის დამადასტურებელი მოწმობა მოსთხოვეს. ჩანაწერი გამოქვეყნებიდან რამდენიმე საათში სოციალური მედიის ყველა არხზე იყო.
ვინტური ბროდვეიზე, Cherry Lane Theatre-ში ერთ-ერთ სპექტაკლზე დასასწრებად იყო მისული. შენობაში შესვლისას, კართან მდგომმა თანამშრომელმა გააჩერა და მას ID ბარათის წარმოდგენა მოსთხოვა. ჩანაწერში აღბეჭდილი ვინტური ერთდროულად არის დაბნეული და – გაბრაზებული. ამ რეაქციამ სოციალური მედიის მომხმარებლებს ცნობილი ფილმის – The Devil Wears Prada-ს საკულტო პერსონაჟი გაახსენა, რომელიც სწორედ ანა ვინტურის შთაგონებით შეიქმნა.
