რამდენიმე დღის წინ მოდის ინდუსტრიას ღია წერილი გაეგზავნა, რომელშიც გაწერილია თუ რა არის საჭირო სისტემის გაჯანსაღებისთვის (იხილეთ სტატია). Rewiring Fashion მსგავსი წამოწყებაა, რომელსაც კოორდინირებას გამოცემა The Business of Fashion უწევს. ინიციატივას ემხრობიან დამოუკიდებელი დიზაინერები, აღმსასრულებელი ხელმძღვანელები და საცალო გამყიდველები. ისინი ერთი მიზნისთვის ერთიანდებიან: შეცვალონ ინდუსტრია ისე, რომ მისი ინტერესები თავიანთ სურვილებს და საჭიროებებს ერგებოდეს.
„მოდის სისტემა უფრო და უფრო ნაკლებად უწყობს ხელს შემოქმედებითობას და საბოლოოდ, არავის ინტერესებს ემსახურება: არც დიზაინერების, არც საცალო გამყიდველების, არც მომხმარებლების — და არც ჩვენი პლანეტის. დროა ტემპი შევანელოთ და ხელახლა აღმოვაჩინოთ „სთორითელინგი“ და მოდის მაგია,“ – აღნიშნულია გამოქვეყნებულ განცხადებაში.
#rewiringfashion აქცენტს სამ საკითხზე აკეთებს: მოდის კალენდარზე, ჩვენებების ჩატარების ფორმატსა და ფასდაკლებებზე, აღწერს პრობლემებს და ინდუსტრიას მათი გადაჭრის გზებს სთავაზობს.
გამოქვეყნებული დოკუმენტის მიხედვით, პრობლემები, რომლებიც მოდის კალენდართან დაკავშირებით არსებობს:
მოდური ჩვენებები ბევრად უსწრებს პროდუქტის მიწოდებას, რაც მის მიმართ სურვილს ამცირებს, როდესაც ის საბოლოოდ მაღაზიაში განთავსდება.
სხვა ბრენდები სწრაფად აკოპირებენ პოდიუმზე წარმოდგენილ ტანსაცმელს და ბაზარზე უფრო იაფად გამოაქვთ.
მიწოდების თარიღები შეუთავსებელია რეალურ სეზონებთან.
ფასდაკლებების სიხშირის გამო სრულ ფასში გაყიდვის პერიოდები ძალიან მოკლეა.
ბაიერები და პრესა ძალიან დიდ დროს, ფულს და ენერგიას ხარჯავენ მოგზაურობაში.
ალტერნატივები:
ქალის და მამაკაცის გაერთიანებული ჩვენებების ჩატარება იანვარში, თებერვალსა და ივნისში, რათა გახანგრძლივდეს სრულ ფასში გაყიდვის პერიოდები და მოგზაურობის საჭიროებები მინიმუმამდე დავიდეს.
ჩვენებები, კოლექციის მიწოდებები და რეალური სეზონები ერთმანეთს შეუთავსდეს, რომ მაღაზიებში ამინდის შესაფერისი კოლექციები განთავსდეს.
მიმდინარე სეზონის პრეზენტაციებს შეუთავსდეს მომდევნო სეზონის ყიდვის პერიოდები, რათა შემცირდეს მოგზაურობა.
© rewiringfashion.org
პრობლემები, რომლებიც ჩვენებების ჩატარების ფორმატთან დაკავშირებით არსებობს:
ჩვენებების ფორმატი ორმოცდაათი წელია არ შეცვლილა, მიუხედავად იმისა, რომ მისი მასშტაბები ბევრად გაიზარდა.
შოუები არ არის სათანადოდ მორგებული ციფრული სამყაროს მახასიათებლებს.
ალტერნატივები:
მოდური ჩვენებები იქცეს ღონისძიებად, რომლის უპირველესი დანიშნულებაც მომხმარებლების ჩართულობა, კოლექციების გაცნობა და მათ მიმართ სურვილის გაჩენა იქნება იქამდე, სანამ ისინი მაღაზიებში გამოჩნდება.
მიღწეული იქნას შეთანხმება, რომ წესები არ არსებობს და არ არის აუცილებელი ყველა ბრენდმა ყოველ სეზონზე გამართოს ჩვენება.
დიზაინერებს საშუალება მიეცეთ თავიანთი სურვილისამებრ მოაწყონ შოუები, ჩართონ თავიანთი მომხმარებლები და ის მედია საშუალებები, რომლებსაც თავად მისდევენ.
პრობლემები, რომლებიც მოდის ინდუსტრიის ფასდაკლებაზე დამოკიდებულებასთან დაკავშირებით არსებობს:
იმის გამო, რომ ამ ეტაპზე ბაზარზე 2020 წლის გაზაფხული/ზაფხულის კოლექციები დიდი რაოდენობით არის გასაყიდად დარჩენილი, საცალო გამყიდველებს მასზე ფასის შემცირება უწევთ.
თუმცა გამყიდველები ყველა სეზონზე იწყებენ ადრეულ და ხშირ ფასდაკლებებს, რაც სრულ ფასში გაყიდვებს საგრძნობლად ამცირებს, რადგან მომხმარებელი მუდმივად ფასდაკლებებს ელოდება, რაც ბრენდებს შემოსავლიანობის და ფასეულობის კუთხით აზარალებს.
ალტერნატივები:
გამყიდველებმა თავი აარიდონ 2020 წლის გაზაფხული/ზაფხულის სეზონისთვის უკიდურეს ფასდაკლებებს და ბრენდის გძელვადიანი ფასეულობის და შემოსავლიანობის მნიშვნელობაზე იფიქრონ.
2020 წლის შემოდგომა/ზამთრის სეზონიდან ყოველი მომდევნო სეზონისთვის ფასდაკლებები იანვარსა და ივლისში დაიწყოს და შეწყდეს შუასეზონური ფასდაკლებები, მათ შორის შავი პარასკევის, კიბერ ორშაბათის და მარტოხელების დღის.
იმ მნიშვნელოვანი სახელების არასრული ჩამონათვალი, რომლებიც ინიციატივას მხარს უჭერენ
